Duncan Gray

 DUNCAN GRAY cam' here to woo

    Ha ha the wooing o't；

    On blythe Yule night when we were fou

    Ha ha the wooing o't：

    Maggie coost her head fu' high

    Look'd asklent and unco skeigh

    Gart poor Duncan stand abeigh；

    Ha ha the wooing o't！

    Duncan fleech'd and Duncan pray'd

    Ha ha the wooing o't；

    Meg was deaf as Ailsa Craig；

    Ha ha the wooing o't：

    Duncan sigh'd baith out and in

    Grat his een baith bleer't and blin'

    Spak o' lowpin ower a linn！

    Ha ha the wooing o't！

    Time and chance are but a tide

    Ha ha the wooing o't；

    Slighted love is sair to bide¹

    Ha ha the wooing o't：

    Shall I like a fool quoth he

    For a haughty² hizzie dee？

    She may gae to—France for me！

    Ha ha the wooing o't！

    How it comes let doctors tell

    Ha ha the wooing o't；

    Meg grew sick—as he grew hale

    Ha ha the wooing o't：

    Something in her bosom³ wrings⁴

    For relief a sigh she brings！

    And oh her een they spak sic things！

    Ha ha the wooing o't！

    Duncan was a lad o' grace

    Ha ha the wooing o't；

    Maggie's was a piteous case

    Ha ha the wooing o't：

    Duncan could na be her death

    Swelling⁵ pity smoor'd his wrath⁶；

    Now they're crouse and canty baith

    Ha ha the wooing o't！